Zeedel

Fasnacht 2024

Download
Basler Dybli Zeedel 2024 - Online.pdf
Adobe Acrobat Dokument 84.8 KB

Rädäbäng 2024

Sujet

Vordraab

Ladäärne

Die wo pfyffe

Dambuurmajoor

Die wo drummle

In digitalisatione veritas - non iam!

sin no die Ächte

zaigt, dass DU nyt me glaube kaasch

wärde transformiert

macht s meeglig

mache dr Bschiss perfäggt


Fasnacht 2023

Download
Basler Dybli Zeedel 2023 - OnlineO.pdf
Adobe Acrobat Dokument 1.3 MB

Rädäbäng 2023

Sujet

Voordraab

Ladäärne

Die wo pfyffe

Dambuurmajoor

Die wo drummle

Fyyr & Flamme

draabt voorus mit Fyyr & Flamme

zaigt, was nie hätt deerfe syy

pfyffe mit Fyyr & Flamme

isch us dr Äsche uffegstiige

drummlet mit Fyyr & Flamme


Fasnacht 2022

Download
Basler-Dybli_Stamm_Zeedel_2022.pdf
Adobe Acrobat Dokument 299.4 KB

Fasnacht 2020/21

Download
Zeedel 2020.pdf
Adobe Acrobat Dokument 252.6 KB

Rädäbäng  2020

Sujet

Voordraab

Ladäärne

Die wo pfyffe

Dambuurmajoor

Die wo drummle

Au DU kunnsch draa!

macht s nimme lang

zaigt d Erleesig fir die Ainte und fir die Andere d Konsegwänz

sin machtloos

bringt d Syychi

hoole au Dii


Fasnacht 2019

Basler Dybli Stamm - Fasnacht 2019

Daarf y oder daarf y nit?

Was fir e Wält isch das emänd,

wo jeede Medizyynstudänt

sich iiber Andri daarf entrischte

und sich drbyy als Guetmentsch brischte?

 

In ere Kischte haan y, ganz dieff unde,

myyni Kinder-Biecher gfunde:

Vom Globi und em Babbe Moll,

baidi sind so supertoll,

vo dr fräche Langstrumpf Pippi,

die nimmt die Elteren uf d Schippi,

vom Käschperli und vom Schorsch Gaggo,

iir Dialäggt duet uf e Sagg goo,

fir mii als Binggis sind die gly

myyni Superhelde gsy,

mit iine biin y ummeghange

und rund um d Wält uf Raise gange.

 

Y blettere duur Täggscht und Helge

und kumm grad reegelrächt in s Schwelge,

drum glaar, haan ych die Gschichtli welle

mym glaine Gettibueb verzelle,

doch kunnt scho noo den eerschte Sytte

sy Mamme wien e Fuurie gritte:

Die Gschichtli gienge hitte z wyt

und basse nimm in unsri Zyt,

iir Wältbild, das vo Afrikaa

und speziell vom schwarze Maa,

isch rassistisch, zem geniere,

die Biecher muess men all zensiere!

 

Ja biin ych jetz, das wär e Mischt,

us Noschtalgyy en ächt Rassischt?

 

Bi Kinderbiecher macht s nit Halt,

s git anders, wo hit au nimm gfallt,

haisst s naime Nääger oder Moor,

denn luurt deert allerheggschti Gfoor,

s kunnt ganz sicher - saggermänt -

e "numme guetmainend" Studänt,

wo sofort, mit em Buuch voll Wuet,

ganz lut "Rassismus!" schreye duet,

und ganz entrischtet ummefroggt:

Was isch ächtsch däm uf s Hiirni ghoggt?

 

Rassissmus isch e schlimmi Sach,

fiert ze Lyyde, Gwalt und Grach,

wär andri wääg dr Farb verlacht,

abläänt oder aagemacht,

isch e ganz en iible Gsell,

wo mer froogloos uf dr Stell

prangeren und strooffe sotte.

Rassismus isch ze rächt verbotte.

 

Ja daarf y jetz no gnisslig welle

e Moro-Bluetorangsche schelle?

Daarf y, ooni s Gwisse z bschysse,

dr Kopf vom Moorekopf abbysse?

Und sprängt s denn hitten alli Gränze

in ere altyygsässe Gugge z schränze?

Woo isch s no grien und woo scho root,

ass mir grad d Juschtizia droot?

Doo kumm y langsam nimme mit:

Daarf y oder daarf y nit?

 

Doch kamm me denn e Woort persee

elai scho als rassistisch gsee?

D Intentioon vo däm, wo s sait,

und eb s dr Zämmehang verdrait,

sind doch gnau die Elemänt,

- verstoot das ächtscht au e Studänt? -

wo Niiderdracht zem Usdrugg bringe

und iiber d Stroofbarkait bestimme.

 

Grad in unser freye Gsellschaft

isch d Mainigsfreyhait noonig abgschafft,

me soll bim Bruuch vom aint oder andre

Woort nid grad in d Kischte wandre.

Und au jeedes Mool das Gschrey:

"Dasch inkorräggt, e Sauerey!"

dennt vyylmool eenter primityyv

und wirggt gar kontraproduggtyyv:

Wär ständig "Fyyr!" schreyt, ooni Brand,

dä wanderet an lingge Rand,

mer stumpfen ab und dien verkenne

wenn s dunggelbruun mool sotti brenne.

 

Drum find y, ass es nyt verschlaisst,

wenn d Gugge wyter "Negro" haisst,

drum isch au Moorekopf$

nit aifach nuur en alte Zopf,

drum daarf in alte Täggscht me loo

Nääger, Roothut, Schlitzaug stoo.

Bi neye Täggscht und neye Namme

deerft men allerdings scho amme

sich noon em hittig Aastand richte

und uf so alti Wort verzichte.

 

Neyi, nit rassistischi Kunschtwäägrgg findet men am Zyschtig uf em Minschterblatz und bi dr Kasärne.

Aber villicht lootet s aint oder ander Wäärgg d Gränzen us und reggt zem Dänggen aa.

Rädäbäng 2019

Sujet

Vordraab

Ladärne

Die wo pfyffe

 

Dambuurmajoor

Die wo drummle

Daarf y oder daarf y nit?

Stoot mit aim Bai scho in dr Kischten und macht drum Blatz, ooni z verletzen oder z diskriminiere

zaigt dr Zwyyspalt, wemme nimm waiss, eb me daarf oder nit

Steen mit aim Bai scho in dr Kischten und verzichte drum prophylaggtisch uff schrilli Deen us Ruggsicht uf Mentsch und Dier

Will nit in d Kischten und daarf drum heggschtens no Joo- und Aasaage

Steen mit aim Bai scho in dr Kischten und draue sich drum gar nimm, iiri Mainig forte z drummle


Fasnacht 2018

Basler Dybli Stamm – Fasnacht 2018

Bruucht s mi no?

Hesch es sicher au scho gheert,
und bisch e weeneli versteert,
dr technisch Fortschritt haltet nit,
halte mir als Mentsch doo mit?

Wo vor hundertfuffzig Joor
die eerschten Auti mit Motoor
d Gutsche vo dr Strooss verdränge
händ Gutscher Angscht ghaa, s wuurd nimm länge.
Statt Resser biirschte, Ställ uusmischte,
sind s jetz Automobilischte,
doch s bruucht niemerts ooni Aanig
vo dääre ney Motoormechaanig.

Die näggschti Wälle rollt scho aa,
e Fliessband haltet halt nie aa,
statt Ainzelstigg, wo nit rentiere,
kaa me dausig produziere,
dr Aarbetsyysatz blybt dr glyych,
dr Fabrigg-Diräggter wird stairyych,
nur d Biezer miend in schwääre Zyte
um Dieffloon-Aarbetsstelle stryte.
Au Brieff mit rainer Musgglegraft
wäärde massewyys abgschafft,
bim Schuufle, Hämmere, Phiggle, Boore
het dr Mentsch scho lang verloore,
Motoor und Staal sind steergger, schnäller,
drfir kai Loon, nyt uf em Däller.

Zem sich geegen Abstiig z weere,
muess men eppis Rächts halt leere,
wo s Grips bruucht und e schaarfe Bligg,
Gnauigkait und ganz vyyl Gschigg,
zem d Maschiinen alli wien e
Dirigänt kenne z bediene.
Dangg Schuel und Leer und Fachabschluss
git s neyi Brieff im Iiberfluss,
woo men allem Aaschyyn aa
kaini Zuekumftsängscht muess haa,
Maschiine sind doch drääg und dumm
und kai Gfoor fir uns Brueffslyt drum.

Die technisch Revolutioon
rollt wyter und dangg Silikoon
kaan e Computer sälber dängge
und ooni Mentsch d Maschiine längge,
dangg als wie glainere Motoore
und Rundumbligg us vyyl Sensoore
schafft e Roboter autonoom,
s bruucht numme noon e weeneli Stroom:

Si faare Taxi, verdaile d Boscht,
pflääge Gäärten und Komposcht,
baue Stroosse, leege Glais,
draage d Keffer uf dr Rais,
koche s Ässe, deggen uf,
bassen uf die Glainen uf,
suuge d Woonig, fääge s Kemmi,
glette d Hemmli, gopferglemmi,
geen Gassi mit em glaine Daggel,
machen au diräggt dr Waggel,
äärnte Mais und mälgge d Kieh,
filze d Heerli ooni Mieh,
fille d Gstell, kassieren yy,
deguschtiere guete Wyy,
richte d Gnoche, operiere,
diend strängschtens Byyljee kontroliere,
luegen uf die laamen Alte,
bagge Broot, diend Schyter spalte,
ziend in Grieg, fange Dieb,
lesche Fyyr und luege lieb,
was me sich nuur dängge kaa
kaasch e Roboter fir das haa.

Ooni no go schaffe z miesse
kaa me jetze s Lääbe gniesse,
doch ooni Loon kenne die maischte
sich dä Luxus gar nit Laischte.
Iirgend wie duet s aim scho steere
ass dääne, wo d Roboter gheere,
dr ganz Profyt yystryyche dien,
die andere go stämpfle mien.

Mit Gligg bisch intelleggduell,
denn findsch villicht no gnapp e Stell
als Banker, Richter, Psycholoog,
Graafiker, Hailpädagoog,
Leerer, Forscher, Schuurnalischt,
Pfarrer, Gloon ooder Jurischt.
Doch d Entwigglig goot voraa,
s git nyt, wo d Technigg nooni kaa,
e jeedem rächt Roboter längt s
dangg kinschtliger Intelligänz
au Dängger-Brieff usstäärbe z loo,
wie soll das numme wyter goo?

Und glyy erraicht scho all das Gräät
die technisch Singularidäät,
denn bruuchts au Brogrammierer nimme,
d Computer diend elai bestimme,
wie s mit dr Zuekumft wyter goot,
d Mentschhait gseet do nuur no root.

Nummen eppis het, au ganz dieff unde,
me noo in kaim Roboter gfunde:
E Seel mit Liebi, Angscht und Muet
isch was dr Mentsch uuszaichne duet,
drum kaa zem Gligg, s wär nimm zem Lache,
e Roboter nie mool Fasnacht mache!

Technischi und anderi Wunderwäärgg findet men am
Zyschtig uf em Minschterblatz und bi dr Kasäärne.
Und wemme Gligg het, denn isch s aint oder ander
Wäärgg deert daatsächlig no vo Mentsche gstaltet...

Rädäbäng 2018

Sujet Bruucht s mi no?
Voordraab Nischte sich in de Fabriggen yy
Ladäärne Dr grooss Aarbetsvernichter
Die wo pfyffe Iibernämme d Aarbet vo de Spezialischte
Dambuurmajoor Dä het sy Aarbet au scho verlooren und isch uusduscht woorde
Die wo drummle Verdryyben au die Letschte, wo no Aarbet händ

 

Fasnacht 2017

Basler Dybli Stamm – Fasnacht 2017

Hau ab, du Sagg!

Hommage an d Trumps, Erdogans,
Assads, Jong-uns, Le Pens, Petrys, Wilders,
Farages, Grillos, Straches, Blochers und alli
andere Narzischte vo dääre Wält

Lägg, bin yych e tolle Siech,
bii dr Scheenscht, dr Gscheytscht, dr Grescht,
leend mii an s Rueder und ych miech
fir mii (und eych) nur s Allerbescht.

Ych bii dää, wo alles kaa,
waiss als ainzig alles rächt,
e reegelrächte Supermaa,
die andere sind alli schlächt.

D Wält bi uns, die lyyt im Aargge,
z vyl Neys, z vyl Fremds, me fyylt sich bschisse,
drum bruucht s so ain wie mii, e staargge
Siech, wo s Rueder no kaa rysse.

Und haan ych d Macht mool an mii grafft,
kaa ooni Ruggsicht schalte, walte,
denne haan yych s ändlig gschafft,
und loogisch duen yych d Macht jetz bhalte.

Die Masche ziet, s git nit vyyl z hoffe,
in mängem Land lauft s drum scho grumm,
dr Wääg zer Diggtaduur isch offe,
und e mängge dängt sich drum:

Lägg, isch daas e dumme Siech,
e Mischig us men Eegoischt,
wo fir sy Voordail alles miech,
und me brächtige Narzischt.

Loogisch drängt so ain nit lätz
in d Bolitygg, ze Wiird und Eer,
dää Bedriib mit Gschwaafel, Gschwätz,
dä lyyt sym Naturell halt seer.

Är verspricht, s wiird alles besser,
populistisch isch är gschiggt,
sy Entourage wird als wie gresser,
wo immer stramm stoot und braav niggt.

So drampt är frey uf allem umme,
liegt, bedriegt, ass d Balgge biege,
Hauptsach, äär het vo de Dumme
d Wäälerstimme kenne griege.

Und schafft är aimool soo die maagisch
fuffzgbrozäntig Wääler-Gränze
denne kaan är, das isch draagisch,
sy schaamloos Répertoire gredänze:

Jetz waiit e ganz e frische Wind,
Scho als eerschts goot äär uf s Ganze,
duet alli hooche Beschte gschwind
syyne treyschte Lyt zueschanze.

Syy Verspräche vor de Waale,
wo men iin jo draa mecht mässe,
die machen iim au gaar kai Gwaale,
die het er lengschtens scho vergässe.

Bewäärti Reegle wäärde broche,
mit Gryttigger het är glyy Grach,
drum duet är d Meedien underjoche,
Toleranz isch nit sy Sach.

Freyhaitsrächt sind uusegmischtet,
mit neye Gsetz und stränger Hand
wird gnaadeloos geeg d Geegner grischtet,
zem Machterhalt im ganze Land.

Und ooni mit dr Wimpere z zugge
bhauptet är, es miess soo syy,
au wenn e kaine mee kaa mugge,
syg s doch jo e Demokratyy.

E Gauner isch s, ab dr Lagg,
es isch aim niene mee zem Lache,
es schreyt in uns: Hau ab, du Sagg!
Was soll me nur mit soo aim mache?

Mer steggen en mit Sagg und Pagg,
kopfvooraa, denn git är Rue,
in e groosse Juute-Sagg
und binden oobe ganz fescht zue.

Und loos, schnäll uf die näggschti Boscht,
d Adrässe lyyt jo uf dr Hand,
mer schiggen en, egaal was' koscht,
per Äxpräss ab ins Pfäfferland.

Die Ydee, die hämmer ghaa,
fir ass' dr Wält wuurd besser goo,
denn wo dr Pfäffer waggst, deert kaa
kai Narzisse Wuurzle schloo.

Narzischtige Wäägen und Reggwysyte git s
bi dr Kasäärnen und pfäffereti Lädäärnen uf
em Minschterblatz.

Und wemme Gligg het, denn findet men au
iirgend naime noon en ainsami Boscht, zem
Päggli uffzgää. S kennt d Wält rette...

Rädäbäng 2017

Sujet Hau ab, du Sagg!
Voordraab jagt die Segg dervoo
Ladäärne zaigt voorne all die Segg, wo in Sagg gheeren und hinde, woo me die aanschigge sott!
Die wo pfyffe sinn schon in Segg gschtopft woorde
Dambuurmajoor schiggt alli in s Pfäfferland
Die wo drummle sinn schon in Segg gschtopft woorde